Трифонова Елена Михайловна

Биһиги ийэбит Трифонова Елена Михайловна 1922 сыллаахха Мэҥэ-Хаҥалас улууһугар, Моорук нэһилиэгэр төрөөбүтэ. Ийэбит 8 саастааҕар ийэтэ ыалдьан өлбүтэ. Онтон ыла эһэтигэр, уус Трифонов Андрей Егоровичка – Сарбааскайга, эбэтигэр Трифонова (Ксенофонтова) Мария Афанасьевнаҕа иитиллибитэ.
Ийэбит Табаҕа оскуолатыгар үөрэммитэ. Оскуола кэнниттэн Калинин аатынан колхозка үлэлээбитэ. Кыһынын хара үлэҕэ үлэлиирэ, балбаах тиэйэрэ, молотилканан бурдук сыстарыытыгар сылдьара. Маһынан оттуллар НАТИ диэн тыраахтарга анаан хаппыт маһы, эргэ титииктэр мастарын кып-кылгас гына эрбииллэрэ. Биир бириэмэҕэ арыы собуотугар рабочайдаабыта. Илиинэн сэппэрээтэрдиир, иккилии уһаат сүөгэйи иирдэр, арыылыыр этилэр. Сэрии иннинэ сайынын ат кыраабылынан Табаҕаҕа Эбэ алааска от мустарара.1941 сыллаахха кураан буолан, от аанньа үүммэтэҕэ. Ол иһин Калинин аатынан колхоз колхозтаахтара Уус Маайа оройуонугар Дарааныга, Уус Миилгэ оттуу тахсыбыттара, барыта 20-н тахса этилэр. Звено чилиэннэрэ былааннаах отторун толору оттообуттара.
Сэрии сылларыгар, эр дьон сэриигэ бараннар, наар ыарахан, эр киһи үлэтигэр сылдьыбыта. Биир кыһын колхоз сыыппаратын толорон Покровскай б. аллараа өттүгэр, Мохсоҕоллоох тыатыгар, өрүс үрдүгэр мас кэрдиитигэр (борохуот оттук маһын), саһаан эрбээһинигэр Ксенофонтова Александра Афанасьевналыын иккиэ буолан кыстаан кэлбиттэрэ. Биир сайын Павловскай с. аттыгар, өрүскэ, Сааһыыр диэн сиргэ оттуу киирэ сылдьыбыттара.
Сэрии бириэмэтигэр биир кэмҥэ биригэдьиирдии сылдьыбыта. Сэрии бүппүтүн кэннэ «1941-1945 сылларга Аҕа дойду Улуу сэриитин кэмигэр килбиэннээх үлэтин иһин» мэтээлинэн наҕараадаламмыта.
Кэлин сельпоҕа, Табаҕа орто оскуолатыгар муоста сууйааччынан үлэлээбитэ.
Ийэбит тыыл, үлэ ветерана, Герой-Ийэ этэ.

Распечатать